Ari Hermóður Jafetsson
Framkvæmdastjóri

Ari hóf störf hjá Stangaveiðifélaginu 2012, en í janúar 2015 tók hann við sem framkvæmdastjóri félagsins. Ari hefur starfað sem leiðsögumaður við margar af bestu lax og silungsveiðiám landsins síðan á unglingsaldri. Uppáhalds veiðisvæði Ara eru mörg, en Mývatnssveit, Laxárdalur, Nessvæðið og Langá taka mestan veiðitímann frá honum yfir sumartímann en í Nesi fékk hann einmitt sinn stærsta lax, 105 cm, árið 2010. Dimmblá og Iða eru þær flugur sem hann notar mest í laxinum en hann er annálaður fyrir það að vilja helst ekki nota neitt nema þurrflugu þegar hann heldur til urriðaveiða.
ari@svfr.is

Edda Dungal
Skrifstofustjóri

Edda er þessi glaða týpa sem tekur á móti félagsmönnum og öðrum veiðimönnum, sem leggja leið sína niður á skrifstofu félagsins, með bros á vör. Hún hefur starfað fyrir félagið síðan 26. apríl 1997 og er hvergi nærri hætt enda ákaflega hress alltaf hreint. Eddu finnst frábært að fara í Gljúfurá í Borgarfirði og gerir það helst á hverju sumri. Þar notar hún oftast Rauðan Frances með góðum árangri þar sem hún er veiðin með eindæmum. Stærsta laxinn sinn sem losaði 12 pund fékk hún þó í Laxá í Leirársveit. Edda stefnir að því að komast í 20 punda klúbbinn, fyrr en síðar.
edda@svfr.is

Stjani Ben
Sölustjóri

Stjáni hóf störf hjá Stangaveiðifélaginu í september 2016. Hann er gífurlega ástríðufullur veiðimaður og hefur starfað í stangveiðibransanum í fjölda ára. Stjáni byrjaði sinn veiðiferil í silungnum og er hann mikill aðdáandi sjóbirtingsveiða. Síðustu ár hefur áhuginn á laxveiði aukist þó stutt sé í ræturnar og drauminn að komast í þurrfluguveiði á stórum urriða. Stjáni hefur starfað sem leiðsögumaður víða um land og skipulagt ferðir til Mexíkó að veiða framandi tegundir. Hann hefur kastað flugu á ófáum vatnasvæðum á landinu og því er tilvalið að leita ráða hjá honum þegar kemur að veiði.
stjaniben@svfr.is

Stjórn Stangaveiðifélags Reykjavíkur

Í stjórn SVFR sitja sjö stjórnarmenn hverju sinni. Formaður stjórnar er kosinn til eins árs á aðalfundi félagsins. Aðalfundur hefur æðsta úrskurðunarvald í málefnum félagsins en þar er einnig kosið um þrjú sæti stjórnarmanna hverju sinni. Aðrir stjórnarmenn en formaður eru kjörnir til tveggja ára. Ný stjórn skiptir með sér störfum á fyrsta stjórnarfundi eftir aðalfund.

Árni Friðleifsson
Formaður

Árni er formaður félagsins og fyrrverandi handboltahetja en í dag starfar hann sem varðstjóri hjá Lögreglunni á Höfuðborgarsvæðinu. Forfallinn veiðimaður með meiru og hefur gaman af stangveiði jafnt sem skotveiði. Fyrsta laxinn fékk hann í Álftá þá 6 ára gamall og hefur verið óstöðvandi síðan. 100cm er hann stærsti lax veiddur í Hofsá á fluguna Skrögg en það er oftast Kolskeggur og Green butt sem verða þó fyrir valin (þó svo að Rauður Frances sé aldrei langt undan). Árni hefur gífurlega gaman af því að veiða í Hítará, en á erfitt með að gera upp á milli einstakra áa.

Rögnvaldur Örn Jónsson
Varaformaður

Röggi er skagamaður sem á ættir að rekja upp á Snæfellsnes en hans uppáhalds veiðisvæði eru á þeim slóðum. Langá og Hítará eru í sérstöku uppáhaldi hjá Rögga en honum finnst fátt skemmtilegra en að egna fyrir lax með gárutúbum á góðviðrisdögum. Stærstu laxana sína fékk Röggi í Austurá í Miðfirði og dugði ekkert minna en 1″ Frances keilutúba á þann 20 punda fisk, annan eins fékk hann í Ferjuhyl á fjallinu í Norðurá og tók hann Sunray Shadow. Helstu verkefni Rögga, fyrir utan ritara starfið, er umsjón með Fáskrúð, Gufudalsá og Soginu.

Ágústa Katrín Guðmundsdóttir
Gjaldkeri

Kata eins og hún er oftast kölluð er ástríðuveiðimaður og hefur áhugi henar aukist jafnt og þétt undanfarin ár. Kata er löggiltur endurskoðandi og verkstjórnandi hjá KPMG og hefur starfað þar síðan 2006. Hún hefur brennandi áhuga á stangveiði og félagsstörfum og hefur metnað og áhuga á að vinna fyrir félagið. Maríulaxinn fékk hún í Elliðaánum á Rauðan Frances og er því viðeigandi að hún bjóði fram krafta sína til hagsmuna fyrir félagið.

Júlíus Bjarni Bjarnason
Ritari

Júlli eins og hann er oftast kallaður hefur verið veiðimaður frá barnsaldri. Í dag starfar hann sem ráðgjafi en hann hefur einnig ráðlagt veiðimönnum á mörgum af ársvæðum Stangaveiðifélagsins í gegnum tíðina. Hítará er hans uppáhalds á, þó svo að hann hafi sótt sinn stærsta lax, 100cm, í Nessvæðið í Aðaldal.

Hörður Birgir Hafsteinsson
Meðstjórnandi

Hörður, eða Höddi eins og hann er kallaður í daglegu tali er ættaður úr Skagafirðinum og hefur verið veiðimaður frá unga aldri. Hann starfar sem sölumaður hjá Ölgerðinni á fyrirtækjasviði. Oftast þegar hann heldur til veiða þá er hann fljótur að þræða Iðu upp á tauminn og byrjar oftast að kasta í svefni fyrir vakt. Hítará, Langá og Laxá í Mývatnssveit eru hans uppáhaldssvæði.

Ólafur Finnbogason
Meðstjórnandi

Óli hefur komið að ýmsum nefndarstörfum fyrir SVFR í gegnum árin s.s árnefndarstörfum og skemmtinefndarstörfum. Hann hefur einnig starfað sem leiðsögumaður í að verða 15 ár og hefur Langá verið hans heimavöllur. Hans uppáhalds á er Langá og Haukadalsá og hann veiðir nánast eingöngu á Frigga þegar aðstæður leyfa.

Jóhann Kristinn Jóhannesson
Meðstjórnandi

Jói er ástríðuveiðimaður og hefur áhuga á öllu sem viðkemur stangveiði. Hann hefur starfað sem leiðsögumaður með hléum í Langá síðastliðin ár og er gífurlega kunnugur þar um slóðir.  Langá Fancy á hug hans allan og tjáði hann mér einu sinni í óspurðum fréttum að hann hefði tekið 26 laxa í beit á fluguna í einu og sama rennslinu.