Almennar upplýsingar

  • Staðsetning: Í Vestur Skaftafellssýslu um 50 km austan við Vík í Mýrdal, um 250 km frá Reykjavík.
  • Veiðisvæði: Rafstöðvarlón og báðar kvíslar Eldvatnsbotna að merktum veiðimörkum. Veiðisvæðið nær u.þ.b. tvo km í hvorri kvísl frá lóninu að merktum veiðimörkum.
  • Tímabil: 28. júní – 10. október
  • Veiðileyfi: Tvær stangir í tvo daga í senn nema í júní og júlí þegar seldar eru heilar vikur frá föstudegi til föstudags. Stangirnar tvær eru seldar saman. Fyrir 27. júlí er einungis leyfð veiði í Rafstöðvarlóni og Fljótsbotni.
  • Daglegur veiðitími: 7-13 og 16-22, 21. júní til 13. ágúst og 7-13 og 15-21, 14. ágúst til 10. október. Veiði hefst og lýkur á miðjum degi.
  • Fjöldi stanga: 2
  • Leyfilegt agn: Eingöngu er leyfð fluguveiði með flugustöngum, flugulínum og fluguhjólum í ánni. Öllum fiski skal sleppt aftur.
  • Vinsælar flugur: Straumflugur og púpur ýmis konar. Mikið er af bæði vorflugu og mýflugu í ánni og skulu veiðimenn taka mið af því við val á púpum.
  • Meðalveiði: Um 100 fiskar á ári.
  • Kvóti: Veitt og sleppt. Öllum fiski skal sleppt aftur.
Veiðikort

Veiðihús

  • Herbergi: 3 herbergi
  • Svefnpláss: Fyrir 5 manns
  • Vöðlugeymsla:
  • Fjöldi sænga: 5

Húsið er ágætlega búið tækjum og áhöldum. Í því eru þrjú herbergi, tvö með tveimur rúmum en það þriðja er með einu rúmi (samtals fimm rúmstæði). Sængur fyrir 5 eru í húsinu. Húsið er bæði raf- og gasvætt, m.a. er örbylgjuofn og eldunarhella í eldhúsinu.

Veiðimenn mega koma í húsið klukkustund eftir að veiðitíma lýkur og skulu rýma það á sama tíma brottfarardag. Veiðimenn leggja sjálfir til allan rúmfatnað og hreinlætisvörur. Vinsamlegast þrífið húsið vandlega við brottför og takið með ykkur allt rusl. Það er ekki bakaraofn í húsinu en eldunarhella og allur helsti borðbúnaður. Húsið er opið og við biðjum veiðimenn að skilja það eftir opið við brottför. Lyklar að húsinu eru inni í húsinu ef menn vilja læsa á meðan þeir eru við veiðar. Fólksbílafært er að veiðihúsinu en það þarf hærri bíl til að aka slóðana niður með ánni.

Gasgrill er í húsinu og ef gas klárast er stutt að skjótast að bænum Botnar til að fá annan gaskút.

Veiðin

Vinsældir veiðisvæðisins í Eldvatnsbotnum hafa aukist mikið undanfarin ár enda er þar að finna bæði fallegt umhverfi og fína veiði, auk þess sem hægt er að setja í stóra fiska.

Eldvatnsbotnar eru efsti hluti Eldvatnsins í Meðallandi í Vestur-Skaftafellssýslu, tveggja stanga sjóbirtingsveiðisvæði í fögru umhverfi í landi Botna. Áin á upptök sín í svokölluðu Rafstöðvarlóni sem er sunnan við bæinn að Botnum. Hún rennur í tveimur kvíslum úr vatninu og er veiði í báðum kvíslunum, einkum þó þeirri vestari. Veiðimenn mega einnig veiða í Lóninu.

Eldvatnsbotnasvæðið er að öðru jöfnu snemmgengara en önnur sjóbirtingssvæði á Suðurlandi og er besti tíminn þar frá því um 10.-14. ágúst og út ágústmánuð.

Búnaður

Best er að veiða ána með 9-10 feta einhendum. Sjóbirtingur er ljósfælinn fiskur og þarf því oft að sökkva flugum til að ná niður til hans og henta því flotlínur með sökkenda vel fyrir veiðar á daginn en þegar komið er fram í rökkur er oftast betra að vera með flotlínur. Ef veitt er með púpum andstreymis er best að veiða með flotlínum.

Leiðarl‎‎ýsing að veiðihúsi

Fjarlægðin frá Reykjavík er um 250 km en ekið er eftir þjóðvegi nr. 1 um 50 km leið austur fyrir Vík í Mýrdal. Þar er beygt til hægri á afleggjara að bænum Botnar. Afleggjarinn er um 6,5 km langur og er farið um hlaðið á bænum, beygt til hægri og áfram um 2 kílómetra að veiðihúsinu.

ANNAÐ

Frá og með veiðisumrinu 2017 skal öllum fiski sleppt.