Almennar upplýsingar

  • Staðsetning: Vesturland. Gufudalur er í 250 km. fjarlægð frá Reykjavík
  • Veiðisvæði: Gufudalsá öll frá ósi og að efri fossum ofan Gufudalsvatns og Gufudalsvatn allt. Heildarlengd veiðisvæðisins er u.þ.b. 8 km.
  • Tímabil: 8. júlí – 8. september
  • Veiðileyfi: Þriggja daga holl frá fimmtudags-eftirmiðdegi til hádegis á sunnudegi og síðan tvö tveggja daga holl. 4 stangir í ánni og vatninu.
  • Daglegur veiðitími: Veiðitíminn er 12 klst. á dag á tímabilinu frá kl. 7-22 heila daga en á skiptidögum skal veiði lokið kl. 13 og má hefjast á ný kl. 15. Lengri hvíldartími er við fossa ofan vatns skv. nánari veiðireglum í veiðihúsi.
  • Fjöldi stanga: 4
  • Leyfilegt agn: Fluga, maðkur og spónn.
  • Vinsælar flugur: Heimasæta, Mýsla, Black Zulu, ýmsar þurrflugur og ýmsir kúluhausar voru vinsælastir á árinu. Litlar flugur, allt niður í stærðir 14 til 16, eru vinsælastar í Gufudal.
  • Meðalveiði: Um 600 silungar og 30 laxar á ári.
  • Kvóti: Enginn kvóti er á veiðunum en við biðlum til veiðimanna að sýna hófsemi
Veiðikort
Veiðistaðalýsing

Veiðihús

  • Herbergi: 6 tveggja manna herbergi
  • Svefnpláss: Fyrir 12 manns
  • Vöðlugeymsla:
  • Fjöldi sænga: 12

Veiðihúsið er stórt og í mjög góðu standi eftir miklar endurbætur vorið 2017. Pallur með heitum potti er við húsið. Þar eru sex tveggja manna herbergi, fjögur með rúmum og tvö með kojum. Eldhús með eldhúsáhöldum og borðbúnaði er fyrir 12, borð- og setustofa, baðherbergi, snyrting, forstofa, kæligeymsla o.s.frv. Á staðnum er gasgrill. Einnig er sjónvarpsskjár, eingöngu fyrir dvd-diska.

Komudag mega veiðimenn koma í veiðihúsið klukkutíma áður en veiðitími hefst og brottfarardag skulu þeir vera farnir úr húsinu klukkutíma eftir að veiði er lokið. Í húsinu mega dvelja eins margir og húsrúm leyfir. Sængur og koddar eru til staðar en veiðimenn leggja sjálfir til sængurfatnað, handklæði og hreinlætisvörur. Veiðimönnum ber að þrífa húsið fyrir brottför og taka með sér rusl en ruslagámur er niðri við þjóðveg. Kort af ánni mun hanga uppi í veiðihúsi ásamt ítarlegri veiðireglum. Skrá skal alla veiði í veiðibók og er sérstaklega brýnt fyrir veiðimönnum að skrá aðeins einn fisk í hverja línu veiðibókarinnar

Veiðin

Gufudalsá er gjöful bleikjuveiðiá tilvalin fyrir alla fjölskylduna. Þarna hafa ungir veiðimenn oft á tíðum stigið sín fyrstu skref í veiðimennsku. Sjógengin bleikja veiðist bæði í ánni og vatninu, mest í kringum eitt pund, en einnig bleikjur allt að fjögur pund. Nokkrir tugir laxa hafa veiðst síðustu árin. Mest veiðist á flugu. Aðgengi að veiðistöðum er gott og gott veiðihús er við ána. Töluvert af veiðinni kemur á land úr Gufudalsvatni en mikilvægt er að það gári aðeins ef fiskur á að taka.

Leiðarl‎‎ýsing að veiðihúsi

Frá Reykjavík eru um 250 km. vestur í Gufudal, og er ekið um Borgarnes, Bröttubrekku, Dali og Gilsfjarðarbrú, og áfram vestur þjóðveg nr. 60, fyrir Þorskafjörð, yfir Hjallaháls og fyrir Djúpafjörð, yfir Ódrjúgsháls í Gufufjörð. Frá vegamótum í Gufudal er ekið inn dalinn yfir litla brú og beygt strax til hægri og er veiðihúsið við enda slóðans niður undir Gufudalsvatni.