Hreinsun Elliðaánna þriðjudaginn 12. júní

Veiðikvöld í dalnum: Elliðaárnar

Árleg hreinsun Elliðaánna verður þriðjudaginn 12. júní nk. og veitir Elliðaárnefnd Stangaveiðifélags Reykjavíkur þessu verkefni forystu eins og undanfarna áratugi. Væntir SVFR þess að félagsmenn og aðrir velunnarar félagsins og Elliðaánna leggi þessu árlega hreinsunarátaki lið.

Elliðaárnar eru bakbein SVFR og gríðarlega mikilvægar fyrir félagið og því er okkur öllum sem í félaginu eru mikið í mun að vel sé að öllu staðið hvað varðar utanumhald og umsýslu ánna. Árlegt hreinsunarátak félagsins er einn mikilvægasti þáttur þessa verkefnis.

Mæting er við veiðihúsið kl. 17 þar sem skipt verður liði og allt rusl hreinsað af árbökkunum og úr ánni sjálfri allt frá Elliðavatni og niður í ós. Gert er ráð fyrir að hreinsunin taki um tvær og hálfa klukkustund – en skemmri tíma ef mannafli er nægur.

Undanfarin ár hafa áhugamenn um Elliðaárnar tekið vel tilmælum um að taka þátt í hreinsun ánna, enda tilvalið að kynnast Elliðaánum á þennan hátt í fylgd með kunnugum, en fáir þekkja Elliðaárnar betur en árnefndarmenn sem fara munu fyrir hreinsunarátakinu eins og endranær.

Elliðaárnar opna síðan með viðhöfn kl. 7 miðvikudaginn 20. júní eins og endranær.

Athugasemdir