Búið er að opna fyrir umsóknir vegna barna- og unglingadaga í Elliðaánum 2020. Í ár eru 5 hálfir dagar í boði fyrir  hámark 15 börn og unglinga í hverju holli, fyrstur kemur fyrstur fær. Foreldrar/forráðamenn þurfa að sækja um fyrir hönd barna sinna en skráningu lýkur 19. maí.

Veiðin er fyrir félagsmenn 18 ára og yngri sem geta veitt sjálfir. Foreldrum sem mæta er ætlað fylgja börnum sínum við veiðarnar en eingöngu til halds og trausts. Foreldrum er ekki leyfilegt að veiða. Á svæðinu verða leiðsögumenn sem leiðbeina við veiðarnar. Hafið í huga að ekki er um barnagæslu að ræða.

Dagar sem í boði eru:

19. júlí fyrir hádegi
19. júlí eftir hádegi
08. ágúst eftir hádegi
09. ágúst fyrir hádegi
09. ágúst eftir hádegi

Þá daga sem veiði er fyrir hádegi er reiknað með að veiðimenn mæti ekki seinna en klukkan 6:30 í veiðihús en þá daga sem veiði er eftir hádegi er mæting 14:30 í veiðhús. Reyndir veiðimenn taka á móti veiðimönnum við veiðihúsið og fara yfir öryggismál, veiðireglurnar, leyndardóma Elliðaánna og hvernig á að bera sig að við laxveiðina.

Hafið í huga:

  • Barnið, unglingurinn þarf að vera skráður félagsmaður og hafa greitt félagsgjaldið. Félagsgjaldið er 4.900 kr. og hægt er að óska eftir félagsaðild á umsókninni hér fyrir neðan.
  • Ánni er skipt í 4 svæði (engin frísvæði) og verða allir að fylgja fyrirmælum sem gilda á þessum dögum.
  • Til að geta veitt þarf að mæta með fatnað og veiðibúnað sem ætlaður er til laxveiða. Gott er að ath. með veðurspána kvöldið áður uppá fatnaðinn að gera.
  • Mjög mikilvægt er að gleyma ekki hlífðargleraugum/sólgleraugum. Án hlífðargleraugna er ekki hægt að veiða.
  • Nauðsynlegt er að fá sér góðan morgunmat áður en lagt er af stað að heiman og gott að hafa með sér eitthvað að drekka en að veiði lokinni bíður hópsins grillveisla við veiðihúsið.

Með kærri veiðikveðju,
Fræðslunefndin

Búið er að loka fyrir umsóknir um barna- og unglingadaga í Elliðaánum 2020